നീ സ്വതന്ത്രനോ

ഇരുളുന്നു,  രാവിന്നഴകേറും  ഭീകര -

നിഴലുകൾ  പ്രത്യക്ഷമായിടുമ്പോൾ 

ഒരു നിലാവെട്ടത്തിലെൻ  മുഖം -

പൊക്കി  ഞാൻ  ജനാലകൾക്കിടയിലൂടെ 

രാവിൻ  നിശബ്ദമാം  രാഗം കേൾക്കുവാൻ 

കാതോർത്തു  നിന്നൊരാ  നിമിഷങ്ങളിൽ ,

എൻറെയുള്ളിൽ   ഭയമാകും  കൊടുമിരുൾ 

മെല്ലെ മെല്ലെ   വന്നെത്തിടുമ്പോൾ 

എവിടെനിന്നോവരും    അശരീരിയെന്നപോൽ 

കേട്ടു ഞാൻ   ഒരാത്മാവിൻ   വിരഹഗാനം .

ഏകയാമെന്നെത്തനിച്ചാക്കി   ഭൂവിലി -

ന്നാരുമില്ലാതെ  ഞാൻ  കേണിടുന്നു 

നാടിന്നു  വേണ്ടി   പോരാടി   നേടിയ 

സ്വാതന്ത്ര്യമെല്ലാം   ഇന്നെവിടെ . 

നമ്മെ  നാം   തന്നെ   അടിമകളാക്കി 

അടക്കി   ഭരിക്കുന്ന   നാടിതല്ലോ 

മരണത്തെ  പുൽകി  ഞാൻ  രക്ഷ നേടാനായ് 

ഇന്നോരാത്മാവായ്  അലഞ്ഞിടുന്നു .

ആത്മാവിനും  ലഭിക്കില്ലയീ നാട്ടിൽ 

സ്വാതന്ത്ര്യമെന്നതറിഞ്ഞിടുന്നു   ഞാൻ 

ആരോ വിളിച്ചിട്ടെന്ന  പോൽ  ഞെട്ടി -

ത്തിരിഞ്ഞു ഞാൻ  നോക്കിയനേരത്തായ്

ഞാൻ കണ്ടു  കണ്ണാടിക്കുള്ളിലായെൻ 

മനസ്സാക്ഷിയാകുന്നൊരു   തോഴനെ 

ആത്മാവുപോലും   സ്വതന്ത്രയല്ലെങ്കിൽ 

വെറുമൊരു  മനുഷ്യനാണല്ലോ  നീയും 

ചൊല്ലൂ , സ്വതന്ത്രനോ  നീ  സുഹൃത്തേ 

ഇവിടെ  നീ  ഏറെ  സ്വതന്ത്രനാണോ ?

***************************************

                                          

''കവിതയുടെ വിഷയം :ഇന്നത്തെ സമൂഹത്തിലെ  ജീവിതരീതികളുടെയും  മറ്റും  ഫലം ''